Janis Kuzeloglu se prisjetio dana u Partizanu: Vujošević mi je donio sok i kroasan, ali kada sam počeo da jedem, samo mi je rekao da krenem opet

Janis Kuzeloglu košarkaš AEK-a prisjetio se dana u Partizanu.

Kuzeloglu je kao 19. godišnjak iz treće lige Grčke stigao u Partizan 2014. godine. Zadržao se jednu sezonu.

Sada sa 30 godina nosi dres AEK-a iz Atina sa kojim će igrati Fajnal-For FIBA Lige šampiona.

“Na početku profesionalne karijere, bio je trener Duško Vujošević u Partizanu. Mnogo sam naučio od njega. Sjećam se svega! To je bilo ogromno iskustvo za mene. Strašno teški treninzi, ali i izuzetni saigrači, najvišeg nivoa. Učio sam mnogo na radeći sa njima i igrajući protiv njih”, rekao je je Kuzeloglu za Meridiansport.

Prisjetio se i kako je bilo raditi sa Vujoševićem.

“Bilo je ludo koliko su svi radili. Sjećam se jedne situacije. Poslije treninga, svi bi šutirali. Trener Vujošević je pred mene stavio dvije stolice, u položaj kao da izlazim iz „stagger“ blokova. Rekao mi je da moram da ubacim 10 od 10 iz trka. Kazao sam: ’OK, mogu 10 od 10“… Ali, dao bih tri, pa bih promašio. Onda bih ubacio pet, pa promašaj. Došao sam do osam od osam, ali sam morao ispočetka.

Stao sam. Nisam mogao više. Vujošević mi je donio sok i kroasan, ali kada sam počeo da jedem, samo mi je rekao da krenem opet. Jer dok ne ubacim, ne mogu da izađem iz dvorane. Da, stvarno je tako bilo”, rekao je Grk i nastavio:

“Bilo je teško, naravno, ali kada sam se navikao, sve mi se to mnogo sviđalo. Znao sam da ako imam toliko teške treninge i pogađam na njima, na utakmici će onda biti lakše”.

Te utakmice nisu došle u Partizanu. Koliko je bio razočaran što je napustio klub u drugoj sezoni?

“Bila je čudna situacija. Trener Vujošević više nije bio tu, klub je promijenio bukvalno sve i otišao sam. Ali, opet… Bio sam u trećoj diviziji, a onda otišao u tim koji je u tom momentu igrao Evrokup. U početku nisam razumio srpski, ali u drugoj godini sam počeo skoro sve da razumijem. Bio sam baš spreman, ali sam morao da odem”.

Otišao je u Apolon, pa preko Lavrija, Arisa, Orteza, Iraklisa i Burgosa, ponovo stigao u AEK u kojem je već proveo jednu sezonu u međuvremenu. Vratio se i došao do situacije da osvoji trofej pred 8.000 navijača u žuto-crnom. I pred Fajnal-for šalje poruku koju je naučio u Partizanu.

“Raditi jako. I boriti se”.

AEK će u petak u 20 časova igrati protiv Unikahe u polufinalu FIBA Lige šampiona.