Andrej Žakelj: Nismo imali napadački dan, ali je trebalo pametnije u odbrani

Andrej Žakelj poslije utakmice finalne serije ABA lige protiv Partizana.

Partizan je dobio treći meč finalne serije ABA lige sa 83:67 i pobjeda ih dijeli od šampionske titule pošto vode 2-1. Od početka do kraja je vodio Partizan pred svojim navijačima. Pokušavali su košarkaši Andreja Žakelja da se vrate, ali nisu uspjeli.

“Čestitke rivalu, zaslužena pobjeda i kontrola cijele utakmice. Dobro smo počeli, fokusirano, kako smo i dogovorili, a onda dopustili lagane koševe iz ofanzivnog skoka i to nas je poremetilo. Nismo imali napadački dan, ali je trebalo pametnije u odbrani. Vratili smo se na minus četiri, a onda počeli previše da igramo individualno, a možemo samo kao tim.

To je stvar o kojoj moramo da pričamo prije sljedeće utakmice. To je, što je. Partizan je bio bolji, moramo da dignemo glave, da budemo kvalitetniji i uradimo sve da produžimo seriju”, poručio je Žakelj.

Sada je njegov tim pritjeran uz zid.

“I mi psihički poslije prve utakmice i dešavanja smo se vratili za kratko vrijeme, što moramo i sada. Ovaj tim ima mentalnu snagu i duel nije bio dobar, ali igrači moraju da vjeruju. Pokazali su da mogu da igraju protiv Partizana. O tome će sutra biti razgovor. Atmosfera je bila vrhunska”, zaključio je Andrej Žakelj.

Naredni duel dva tima na programu je u četvrtak od 20 časova takodje u Beogradu.