Andrej Žakelj: Znali smo generalno kakvu odbranu Partizan igra, gdje možemo da tražimo poene

Andrej Žakelj trener Budućnosti govorio poslije pobjede protiv Partizana.

Budućnost je u šestom kolu Top 8 faze ABA lige na svom terenu pobijedila Partizan 95:89. Trener Podgoričana Andrej Žakelj bio je zadovoljan izdanjem svoje ekipe.

“Čestitke igračima, zasluženo su pobijedili. Zasluženo je i da im se vrati sve što treniraju u ovom periodu poslije Evrokupa, uz sve probleme sa povredama. Pokazali su pravi mentalitet i dobar pristup. To je najbitnije. Partizan je bio veliki favorit, sa vrlo dobrom igrom i formom u Evroligi.

Drago mi je da nam je uspjelo da pobijedimo tako dobar tim, uz pomoć navijača, atmosfera je bila vrhunska. Počeli smo mekše, nešto smo rizikovali i nije nam se isplatilo. Poslije smo to promijenili i uz pravi pristup i koncentraciju slavili. Svaki igrač je dao doprinos u svakom smislu. Timska pobjeda”, istakao je Žakelj.

Agresivnost na lopti je bila na nivou.

“Uvijek su te osnovne stvari najbitnije. Promijenili smo odbrani, isplatilo se i bili smo agresivniji malo. Odličan posao je odradio Kovliar. Na kraju, timski rad i timska pobjeda”.

Njegov tim je imao dosta poena iz reketa.

“Znali smo generalno kakvu odbranu Partizan igra, gdje možemo da tražimo poene. Džeri Butsijel je dobro iskoristio dogovorene stvari, uz pomoć ostalih igrača. Imali smo plan utakmice, ne ide sve uvijek tako kako zamisliš. Danas je fokus bio bolji nego u prošlim utakmicama. Na kraju je rezultiralo pobjedom.

Pripremali smo se za pojedince, to kako će Karlik Džons da napada kada preuzmemo… Bili smo fokusirani na male stvari, zadovoljan sam što je tim tako reagovao, kao što sam rekao. Uz probleme sa povredama, teškim treningom, velika pobjeda. Na početku je bilo jeftinih grešaka nekih, moguće da je to bila nervoza, ali to je sastavni dio svega. Sve to može da se ispravi i ispravilo se”.