Trinkijeri: Ima nešto dobro

Andrea Trinkijeri nakon poraza od Zenita.

Dobro prvo poluvrijeme Partizana, ali katastrofalna treća četvrtina i crno bijeli su peti put poraženi ove sezone u Evrokupu. Zenit je na domaćem terenu slavio pobjedu 75:71.

Trener Partizana Andrea Trinkijeri rekao je poslije meča da je utakmica trebala biti odlučena u prvom poluvremenu.

“Utakmica je odlučena poslije prve dvije četvrtine. Trebalo je da budemo na plus 20 po kvalitetu igre, kako smo napadali, kako smo igrali odbranu. A završili smo sa plus četiri, jer smo promašili šest slobodnih bacanja, izgubili devet lopti bez ikakvog razloga i dali im 10 skokova u napadu. Nemoguće je tako dobiti utakmicu. Igrali smo timski, ali falio nam je važan igrač i to je bio prvi problem. Drugi problem je bio što u trećoj četvrtini i prvih pet minuta četvrte četvrtine nismo odgovorili na njihovu snažnu odbranu. To je bilo jako loše, ali ima nešto dobro…”

Našao je Trinkijeri i nešto pozitivno u porazu.

“Mogli smo ‘laganica’ izgubiti utakmicu sa 20 razlike, bez ikakvih problema. Međutim, našli smo nekoga ko želi da se bori do kraja, našli smo hemiju i vratili se u meč. Mogli smo da dobijemo i trebalo je da dobijemo, ali mislim da je bolje izgubiti sada i naučiti nešto, nego ‘ukrasti’ pobjedu u ovakvoj utakmici.Da budem realan, mi imamo toliko stvari da naučimo. Izgubili smo sa četiri poena razlike, a jedan i po igrač je igrao dobro, ne više od toga. Šta to znači? Da imamo puno prostora da budemo bolji.”